«ЕРТӨНЦИЙН ШИНЖЛЭХ УХААНЫ ДҮР ЗУРГИЙН ӨӨРЧЛӨЛТ БА ФИЛОСОФИ» СЭДЭВТ СИМПОЗИУМ БОЛЛОО

2005 оноос хойш ЮНЕСКО-гоос жил бүрийн 11 дүгээр сарын 20-ны өдрийг Дэлхийн философийн өдөр болгон зарласан билээ. Энэ өдрийг тохиолдуулан ШУА-ийн Философи, социологи, эрхийн хүрээлэн, ЮНЕСКО-гийн Монголын Үндэсний комисс хамтран“Ертөнцийн шинжлэх ухааны дүр зургийн өөрчлөлт ба философи” сэдэвт симпозиумыг 11 дүгээр сарын 20-ны өдөр амжилттай зохион байгууллаа.

Хурлыг нээж ШУА-ийн Ерөнхийлөгч Б.Энхтүвшин, ЮНЕСКО-ийн МҮК-ын Ерөнхий нарийн бичгийн дарга Г.Жаргалсайхан нар үг хэлсэн юм.

 Симпозиумд байгаль, нийгэм-хүмүүнлэгийн шинжлэх ухааны салбарын 20 орчим эрдэмтэн судлаачид тодорхой шинжлэх ухааны философи асуудал; физикийн шинжлэх ухаан дахь эгэл бөөмсийн судалгааны үр дүн; генетикийн шинжлэх ухааны биологи болон бусад салбар шинжлэх ухаанд үзүүлж буй нөлөө; шинжлэх ухааны нийгмийн үүрэг ба судалгааны ажлын чанар, үр өгөөжийг дээшлүүлэх арга зам; шинжлэх ухаан ба хуурмаг шинжлэх ухааны ялгаа; шинжлэх ухааны ёс зүй, эрдэмтэн хүний нийгмийн хариуцлага зэрэг асуудлаар илтгэл хэлэлцүүллээ.

Уг симпозиумд ШУА-ийн Философи, социологи, эрхийн хүрээлэн, Физик технологийн хүрээлэн, Хими, хими технологийн хүрээлэн, Биологийн хүрээлэн, Удирдлагын академи, ШУТИС-ийн БУХС, АШУҮИС, МУИС, ШУА-ийн Одон орон, геофизикийн судалгааны төв зэрэг сургалт, эрдэм шинжилгээний байгууллагын тэргүүлэх эрдэмтэд илтгэл хэлэлцүүлсэн бөгөөд илтгэлийн эмхэтгэлийг хэвлүүлж уншигчдын хүртээл болгоод байна.